Anu kitu aya dina WA

Ibu-ibu raribut, teu genah cicing. Aya béja, pabéja-béja, patatalépa, geunjleung, matak teu genah pipikiran, matak bingung. Bingung kudu kumaha antisipasina jeung kumaha ngeureunkeun eta béja, utamana ulah nepi ka barudak, komo ka anak incu mah.

Ceuk béja, dina WA nu ayeuna mah, aya emotikon anu bentukna GIF, pilihanna loba pisan, kaasup anu kararitu, anu teu pantes sacara moral jadi alat komunikasi dina bentuk gambar hirup. 

Bi Janah ogé milu riweuh. Manéhna buru-buru bébéja ka Pa Guru ngeunaan GIF. Waktu manéhna bérés nerangkeun kahariwangna, Pa Guru imut bari saurna, 'Ari Bi Janah, tos ningali ku sorangan can naon ari GIF teh?'

Bi Janah geuwat ngawalon, 'Atos Pa, iiih eta mah Pa, pami dibuka, gambarna téh sing garitek, siga hirup. Abdi mah melang, kumaha pami murangkalih muka éta.'

Pa Guru katingal sedih, anjeunna nyarios, 'Urang kudu hariwang narima GIF anu keur bangsa urang mah kacida ciderana ceuk ukuran moral,  etika, oge budaya. Ngan urang kudu  leuwih-leuwih hariwang ka jalma anu teu eureun-eureun nerekabkeun, ngirim kaditu kadieu ieu béja. Asalna nu teu nyaho, jadi hayang nyaho, hayang nempo. Dina jero sapoé,  asalna nu nyaho ngan saurang, ayeuna mah, saIndonesia boa geus nyobaan muka GIF nu dipahing téa.'

Pa Guru katingal seunggah, anjeunna neraskeun cariosanna, 'Barudak ayeuna mah hirup dina zaman digital, ti borojol orok beureum maranehna geus apal naon wae anu aya dina hapéna. Maranéhna milih naon baé anu dipikaresepna. Pikiran barudak tangtuna teu sarua jeung pikiran urang anu geus kolot anu sok nyangka goréng bae ka barudak. Barudak mah teu loba maké WA, tapi make LINE, IG, Telegram.'