Kieu kénéh

Subuh2, jam 2 geus tuturubun maké motor muru ka Bogor. Untung indit anu ayeuna mah Bapana daék nganteur.  Melangeun sugan, budak awéwé indit tabuh 2 subuh sosoranganan kana motor. Pan ayeuna mah loba kabéjakeun hal2 nu goréng.
Cénah aya nu dipaok motorna. Api2 nabrak ti tukang, terus ngagolepak, nu nubruk nyampeurkeun sugan téh rék nulungan,  padahal mah rék nyokot motorna, nu boga motor mah euleugeug hookeun motorna dibawa indit. Sakitu gé untung kénéh nu boga motor teu digunasika.

Terus hal goreng lianna nyaéta pulisi. Pulisi mah siga nu resep ngaheureuyan budak kuliahan téh.  Disebut ngaheureuyan téh pedah wé saban liwat ditilang, bangun2 geus dicirian motor anu éta kudu diarah.
Dipegat, diajak ngobrol, diajak transaksi kaamanan pajar aya aturan nu dilanggar, ngasongkeun paménta, kufu dibayar ku duit damey. Uang daméy teh haregana 150 rebu. Uluh mahal jeung duit gedé.  Tapi keur budak kuliahan mah batan ngabela diri, mending méré duit.  Lebah gerak cepatna mah alus, urusan langsung bérés,  ngan orokaya ari keur kolot mah, ngayakeun duit  150 rebu téh pan sakitu héséna.

Budak téh ayeuna semester 5 di Sampoerna University. Manéhna kapeto jadi panitia Ospek keur mahasiswa angkatan 2018. Ari kawanina mah, luar biasa, cacakan awéwé,  wanian. Naék gunung, neuleum ka laut, éstuning teuneung ludeung. Kagiatan Ospekna cenah nepika Salasa. Matak bingung, salila 2 peuting manéhna saré dimana.  Budak téh dititah kos2an, embung majar téh lebar ari kuliahna ngan 2 poé mah. Mendinh bulak  balik wé  ti imah. Cicing di adi beuteung do Tangerang, teu pati sumanget, alesanna anget wé cenah capé,  indit subuh, jam 5 kudu geus dina karéta. Neangan kosan wegah.

Mudah2an wé engké mah manggihan kosan anu matak manéhna betah.  Karunya atuda lamun bulak balik Cianjur-Bogor-Jakarta kana motor mah. Lamun kana mobil onaman, teu kaanginan, kahujanan, kapanasan. Lain teu boga mobil mah. Boga. Ngan euweuh, nyangkut di adi beuteung. Duka kumaha urusanna. Mobilna euweuh  duitna euweuh. Bapana budak siga anu teu pati melang, padahal mobil téh pan duitna meunang anjuk ngahutang.  Teu kasaan maké da ti mimiti kabeuli, dipaké ku batur alesan keur konsolidasi partéy. Ayeuna, lesot ti partéy,  ku adi beuteung ogé,   sarua, lapur.

Hirup téh kieu2 kénéh wé.  Bapana amprung2an dina partéy.  Kuring amprung2an néangan duit keur maraban kulawarga. Barudak ngamprung dina urusanna séwang2an.
20.08.2018