Tukang Boboko

Sari keur meunang bagja. Sanggeus jatuk rami, sataun kaduana kasinugrahan boga anak. Ti mimiti ngandeg nepika brolna si utun inji, Sari kasebut dinangna dinéngné pisan ku salakina, Heru. Sagala kahayang teu aya nu di pungpang. Ceuk  paribasana, tong boro ménta sangu ka tatangga pédah kabita ku seungitna,  najan ménta pakél ngora tengah peuting ogé, pasti bukti. Heru éstuning nyaah totomplokan ka pamajikan nu keur meujeuhna mabok samar kahayang téh. 

Atuh komo ayeuna, sanggeus brol anak kameumeut buah ati. Teu sirikna unggal usik orok jeung indungna téh ditempoan. Méméh indit gawé, nyempetkeun nyium orok. Majar téh resep ke seungitna. Seungit orok. Bari kituna téh teu poho celengok nyium tarang indungna orok. Bisi sirik cenah, piraku ngan orokna hungkul.  Sari ukur seuri konéng ningali kalakuan salakina anu sigana téh kabagjaan tomplok ngan ukur keur manéhna duaan jeung orok hungkul. 

Ti poé ka poé, Héru nyieun ciri dina kalender. Ngitung umur orok, éh lain kétang, ngitung iraha bérésna 'puasa'. Panan lamun acan 40 poé mah, narah, di pahing pisan ulah waka campur. Saban isuk nini paraji datang. Nya nini paraji pisan nu omat-omatan ka Héri kudu kuat sabar. Dina mangsana, bakal meunang gumurih. Héri ukur kéom waktu nini paraji nerangkan naon ari gumurih téh.  

Héru beuki suhud kana gawé. Hayang pisan nyenangkeun pamajikan jeung orok ku hasil késangna pribadi. Indit isuk balik magrib téh lain bobohongan. Kituna téh sabenerna aya tujuan ngarah teu mikiran teuing poé di mana Héru bakal meunang gumurih.