Ngulikeun Nyabutan Huis

Memeh ka Jakarta, kuring kakarak boga waktu keur dipotong rambut. Poe Senen, jam 9 kuring ngadius ka Salon C, langganan. Lamun isuk-isuk mah tara lila nungguan. Lamun rada beurang, kudu nunggu tilu atawa opat urangna. Sok asa miceun waktu teu puguh ari kitu teh. Ngajentul nungguan giliran. Ari dibatalkeun geus kagok nungguan, ari teu indit, lila pisan ngurus ti hiji sirah ka sirah nu lain teh. Matak sok milih isuk-isuk we, ngarah jadi pelanggan nomer hiji. Lain nomer hiji tina jajaran pelanggan panghadena ceuk pihak salon, kahiji datangna ieu mah.

Jam satengah 10an nepi ka salon C teh. Bener we, si Ibu tukang motongna tacan aya. Nu geus nyampak mah barudak anu meujeuhna resep make bulu mata palsu jeung di beureuman beungetna siga artis Korea, aya kana 4 urangna. Marenehna ngahibur dirina sorangan ku nyetel lagu barat, duka nanahaon, da bangun narimateun pisan ngadengekeunna terh bari nurutan ceuceuleuweungan. Ningali maranehna ngawih basa Ingris, kuring reueus, urang Cianjur teh barisa ngomong basa asing. Atawa cinta basa asingna luhur pisan nepika teu apal lagu Cianjuran, komo ceuceulweungan ngawihkeunna mah.

Barang gok langsung ditanya, "Keramas Bu?"
"Moal, teu kedah, nembe tadi enjing kuramas," kuring ngajawab saujratna.
"Barangkali mau keramas sambil dipijit biar enak," pok budak awewe anu make baju merecet.
"Moal, cekap, langsung dipotong we," kuring keukeuh teu daek.

Dina hate kuring nyenghel seuri. Asa aya ku lucu, dua basa anu beda tapi bisa nyambung ngobrol. Si Eneng keukeuh make basa Indonesia, kuring keukeuh make basa Sunda.  Mun kitu atuh dina make basa Inggrisna oge, langsung nyambung.

Buuk dibaseuhan tina cai anu disimpen dina semprotan. Pagawe anu rada aya umuran kadenge nelepon si Ibu salon, ngabejaan yen aya tamu. Hawr-hawar kadenge nanyakeun naha tamuna dikeramas atawa henteu, Manehna ngajawab bari bangun mentegeg saeutik nyebutkeun henteu, bade langsungan di potong. Kuring api-api teu ngadenge we.

Anu nyemprotan buuk bari ramo-ramona ngayap kana kulit sirah, nyarita, "Bu, ada uban, mau di cabutin?'
"Teu kedah, wios, kitu we." Kuring ngajwab siga nu teu boga kecap-kecap anu mantes, make kekecapan anu tadi bulak balik.
"Bu, mau dicet ga rambutnya biar ga keliatan ubannya." manehna nawaran solusi keur urusan huis, anu meureun ceuk manehna mah kudu diurus.
"Cobi ningal, warnana nu kumaha wae, sabaraha pangaosna, sabaraha lami pami dicet?" kuring merekpek nanya. Dina pikiran kabayang, lamun dicet beureum, meureun siga Surili, ih baraid teuing.  Nanya soteh pedah karunya we kanu nawaran, ti tatadi panawarna ditolak terus-terusan.

Sanggeus buuk lantis, manehna eureun nyemprotan buuk. Terus ngabejaan yen si Ibu salon nuju di jalan, sakedap deui dugi. Kuring teu pati malire. Terus we ningalian warna-warna pewarna rambut, anu puluhan  geuning. Saumur hirup tacan pernah dipikok, apanan cenah haram, matak teu kapikiran ngarobah warna buuk. Barina lamun  diwarnaan, lalaunan meureun ngeser tah warnana teh, meureun kudu ka salon deui ngatah warna buukna teu dua rupa. Nambah pigaweeun.

Keur anteng ningalian warna buuk, kadenge aya nu asup. Si Eneng anu opatan muru ka tamu nu karak datang.

"Tolong urusin uban Ibu yah, baru 40  kok ubannya udah bikin ga enak," kadenge manehna menta tulung bari bangun gegelendeng nyalahkeun huis anu geus norojol teu sesuey jeung kahayangna.
Kuring ngareret ku juru panon. Ih geuning, ibu-ibu sosialita, make baju satuur, sendalna anu mahal tea, anu hargana cenah 3 juta sapasangna teh, merek Birkenstok, anu ceuk babaturan kuring mah, di Singapur ayana ge sendal anu kitu mah.

Kuring ngomong ka diri sorangan, 'Oh meureun nu kieu jelema beunghar teh," ari panon mah teu wani nempo kana rupana mah. Ngan wasa neuteup sendalna we bari ngabanding-bandingkeun jeung sendal Carvil nu kuring. Modelna mah mirip, ngan ari merek mah, eh brand mah pan teu ngabohong.

Si Eneng cuh cih ngagimbung nyabutan huis. Kuring tungtuna balik deui melong kana cet rambut. Dina hate teh, sugan kudu milu dicet buuk teh ngarah siga jelema beunghar. Untung pikiran teh teu laju, si Ibu tukang salon kaburu datang. Manehna langsung motong rambut, geus teu tatanya deui, langsung krek-krek, dan geus apal kuring mah sok dipotong pendek cukup sajengguteun we panjangna mah.

"Haduh aga cepatan dikit yah, anak sayah mau bubarandari sekolahnyah," ceuk ibu anu make sendal mahal.
Kuring panasaran, ngareret seutik. Gebeg. Geuning huisna loba. Teu sieun botak sugan. Najan loba duit ge, ari botak mah, hoream.