Biaya Jadi Pengawas

"Séép sabaraha lbu?" Iskandar nanya ka Anita anu rék der pisan dilantik virtual pikeun jadi pengawas SMA. Leungeun Iskandar  nyekel pageuh hapé anu ditapelkeun kana ceulina. Bangun sieun aya kecap-kecap ti Anita aya nu labas teu katangkep ku ceulina.

 lskandar ngarasa kacida panasaranna. Naha Anita bisa dilantik tiheula ari manéhna henteu.  Apanan perjuanganna sarua. Enya, panan sarua babarengan tes seléksi di Lémbang. Terus, sarua bulak balik OJT-OJL di Sukabumi-Cianjur. Malah mah sarua nganti- nganti mangbulan-bulan. Ari ayeuna aya béja lamun Anita  mah dilantik,  ari lskandar mah, lapur teu aya kotrétna dina surat ondangan pelantikan anu jolna ti dinas provinsi Jawa Barat. Matak mentegeg.

Matak teu nunggu lila gentak baé Iskandar  nelepon hayang nyaho béak sabaraha Anita ngajul SK pengawas nepika dilantikna dina poé ieu.

"Tujuh puluh juta Pa," écés pisan Anita ngajawab. Beu, tujuh puluh juta! Geuning aya ku mahal jadi pengawas téh. Baheula mah taya nu hayang, teu maliré-maliré acan najan diasong-asongkeun gé, ari bieu teu nginjeum ceuli, ceuk Anita tujuh puluh juta. Na ka saha tah jalurna, saha nu jadi médiatorna. Kudu ditanyakeun ngarah bisa nuturkeun. Piraku rek anger kieu waé. Taun ajaran anyar geus nyampeuk. Ari ménta jadwal, pan geus nyekel surat tanda lulus pengawas; ari teu ménta jadwal ngajar, kumaha lamun elat deui pelantikanna siga seméster kamari. Tungtungna pugag, ka kelas henteu,  da taya jadwal,  cicing di ruang guru,  teu ngeunah,  da acan dilantik jadi pengawas.

Najan kagok gé, heurin ku létah,  da puguh teu biasa sugak sogok,  Iskandar maksakeun nanya.

"Ka saha Bu masihkeunna, ngango jalur naon?"

Sora  lskanar rada dareuda,  nanyanya pinuh ku kakagok, bari kitu na téh, angenna mah geus miheulaan seueul. 

Teu riuk-riuk, taya kapaur, ngagalantang pisan Anita nyarita,  "Ditransfer ka Bu Méli."

"Bu Méli?"  lskandar nanya deui. 

"Muhun, pan abdi mah ngango jalur partéy, pan pun lanceuk orang partéy, Pa Is."

"Oh, kitu? Partéy...  pantes atuh. Rumaos abdi mah teu didukung ku partéy nanaon, abdi gaduh kartu anggota PGRI, tapi da sanés partéy éta mah."

 "Saé tong nurutan Pa Is,  ulah nuturkeun cara abdi. Ayeuna tina kaputusan éta,  abdi balukarna kedah setor saban sasih kana opat jutaan mah kedah, salami lima taun."

"Lima taun? Waduh...."  lskandar langsung  jempé.  Pikiranna ngacacang ka taun-taun nu tacan kasorang. Lima taun, mayaran saban bulan. Tunjangan profesional pengawas téh atuh nyamos, teu katarima,  lamun dipaké setor mah. Ari Anita naha bet wani kitu. Teu kaharti,  panan manéhna téh kaitung jelema idealis.  Piraku hayang jadi pengawas sakola waé nepika wani maké jalan kotor.

"Pa Is,  aya kénéh di dinya?" Sora Anita ngoncrang pisan. Béda ari geus rék dilantik mah, sorana gé teger pisan. 

"Abdi Bu, nuju ngemut. Héran, ku teu ngartos. Sakaterang abdi, lbu mah guru nu pengkuh,  naha bet masihan 70 juta sagala kanggo janten pengawas téh."

"Har, ari Pa Iskandar. Na da abdi mah teu nyarioskeun biaya janten pengawas.  Ieu mah biaya éta téa,  uang muka mésér mobil. Pan Pa ls badé mesen ogé sanés?"