Ngirim Jurnal Sieun Mayar

 

Sanggeus dicoba diomean, bari jeung ahirna mah teu yakin, ah atos we, dikirim tah jurnal teh. 
Kulantaran ieu mah pangalaman mimiti ngirim jurnal ka Scopus, atuh puguh we tag teg tog. Sagala teu nyaho.
Kudu aya cover letter. Naon atuh cover letter teh, nyuratan ka editor mun urang ngirim jurnal. Maksudna kulonuwun. 

Geus kitu kudu ngeusian OCID, metadata, intina matak leneng. Lamun teu dibimbing Ibu Ros dosen, ti mana mah, poho deui, ah pamohalan bisa ngeusian. Sabari ngeusian, sabari bener-bener asa asup ka dunya anu anyar. 
Minggu mimiti, dibimbing ukur bisa nepika ngeusian highlight. Mandeg, saban rek ngeusian co author, ditolak, wae.
Terus diomean, salahna dina reviwer, tipsna, ulah make reviewer ti universitas anu sarua! Halah, ka saha atuh, panan urang mah lain dosen. Ceuk Bu Ros teh, eta buka referensi. di dinya panan aya author anu bidangna sama. Pilih, kopi ngaran jeung emailna, kirim we.
Asa gagabah pisan nya. Tapi mun urang teu ngacapruk kitu, moal kakirim-kirim tah jurnal teh. Tungtungna asal we, kirim nagaran saha mah teu wawuh. Kalakuan anu lain turutaneun pisan ieu mah!

Minggu kadua, macet deui, teu bisa ngeusian hayang gratis. Lamun mayar panan 45 juta. Bedul, ti mana boga duit sakitu. Boro-boro 45 juta, 45 rebu ge euweuh ayeuna mah. Milihan teh jurnal anu hybrid, anu bisa teu mayar. Lain embung ngadukung ka editor, teu mampuh mayar, euweuh duitna, ari lulus kuliah, hayangna nataku. Hampura editor. 

Lalakon ngirimkeun jurnal Scopus, anu kudu Q1,2,3 dina minggu katilu. Teu bisa keneh ngirim. Lain ku nanaon, ku teu nyaho we. Untung we miluan bimbel Scopus, mayarna ge 4 juta, nyaho! Heueuh mahal. Matak lain bantrak-bantrakeun keur tukang macul. Najan anu calon doktor oge, keureut ceuli, mun nyaho kabeh kumaha carana ngirim jurnal ka Scopus. Ceuk beja mah, para calon doktor, nu laloba duit mah, ukur calik, jurnal aya nu mangnyieunkeun, mangngirimkeun, manehna mah ukur kari mere duit we, antara 15 juta nepika 75 juta. Gelo pisan nya!

Lahaola we dikirim. Dina pikiran teh, lamun diengke-engke, beuki nyerelek waktuna, leuheung mun ditarima, kumaha mun ditolak. Panan anu ditarima oge, maca dina grup handling jurnal, aya nu nepika 10 kali diomean, geus kitu, DITOLAK!! Archived. Matak gering pan kana batin.

Pas rek ngirim teh ngarongheap pilihan rek mayar atawa rek gratis. Nya atuh milih nu gratis. Bari jeung duka teuing lah. Boa kudu mayar engkena. Mun enya mayar mah, rek bebeja mundur we.

Tah kitu lalakon kuliah di UPI, jurusan pendidikan masyarakat teh. Ayeuna mah kudu boga jurnal Q1 cenah. Atawa minimal Sinta 2. Kitu ceuk aturan nu anyar. 

Kuduna ayeuna urang berjuang deui, nulis keur SInta 2. Ngan nya kitu, hese panan nulis keur jurnal mah. leuk-leuk. 

Tapi, arek dicobaan nulis deui. Neangan Sinta nu gratis, sigana moal aya Sinta gratis mah.
Lamun Scopus gratis atau subscription pasti aya. 

Bismillah jurnal kadua bari ngeureuyeuh nulis bab 2 disertasi.