Ngadadak

Hawa di jero BEC karasa eungapna. Bau campur antara baju anyar, Roti 'O, Teriyaki, Ayam Geprek, paburisat minuhan irung. Maksakeun we cicing di tempat tunggu, sisieun nu maraen bilyar. Ngan di dinya-dinyana anu bisa diuk kalayan rada tumaninah, dina harti aya korsi, aya meja, bisa nyarande kalayan tonggong rada lempeng. Di tempat deukeut budak nu maen drift, anu eukeur ditungguan ku kuring, aya tempat diuk. Ngan teu ngeunaheun, da memang keur diuk anu maraen bilyar. Panon mah rut ret nilik kayaan, Waktu geus nunjukkeun pukul 9 peuting, tunduh. Awak asa lungse, hayang ngagoler, ngareureuhkeun kacapae anu geus di tahan ti dua poe katukang. Teu bisa kumaha, budak hayang keneh men drift, neika jam 9.30 cenah. 

Diuk pundah pindah neangan nu kira-kira genah. Dina tempat nu asal, asa kurang nyalse, Lur lar nu ngaliwat barudak meujeuhna buta tulang buta daging, saumuran mahasiswa, awewe, lalaki, di kerudung, teu di kerudung, jul jol, arasup ka tempat bilyar. Anu awewe bari maen bilyar, bari ngaroko Vape. Euh kitan kieu kahirupan Bandung ti peuting. Ati baheula mah, awewe teh sieun mun make kerudung asup ka tempat bilyar. Ayeuna mah, kerudung mah mode bae, sugan. Kuring teu bisa ngritik pakean dihubungkeun jeung kalakuan. Panan kuring oge, umur 54 taun, make kerudung, keur cindeluk sisi tempat bilyar. Naon bedana jeung barudak awewe ngarora nu keur ngaroko Vape bari nyekel gagang Bilyar di jero kaca?

Keur ngararasakeun cape jeung tunduh, kring aya WA ti Pa Cc, nanyakan jadwal wawancara ti BBGP. Euleuh wawancara naon, naha bet wayah kieu? Ceuk Pa Cc manehna oge narima bejana bieu. Nya enggus atuh, kumaha deui, jaman kiwari mah, euweuh jam kerja. 

Sihoreng nanyakeun saha nu bisa ngaganti Pa Cc keur konfirmasi kuring asup finalis Jambore GTK Hebat 2024. Asa matak heran, bet bisa lolos. Ti mimitina oge geus katoong ku kuring  mun moal lolos. Eusina sakadar nyaritakeun kahirupan pagawean, kumaha kuring gawe. Teu aya nu aneh. Piraku lolos. Meureun milik we, meureun teu aya deui nu miluan, matak lolos. Ayeuna mah kumaha carana sangkan aya nu bisa ngaganti Pa Cc anu isukan jam 10-12 Jumaah keur aya dina pesawat. Teu kuat mikir, ka Pa Cc dibejakeun isukan we diurusna. 

Jam 10 leuwih kuring jeung budak ninggalkeun BEC. Geus sepi. Jalan kosong molongpong. Nepi ka imah tabuh 12an. Teu kuat nanaon, langsung bae sare.

Isukna, kakarak konfirmasi ka Ibu Kepala KCD lamun aya wawancara poe ieu jam 10-12. Sihoreng anjeunna tos apaleun, mangga saurna, engke jam 10.30 join. Poe ieu aya acara Darma Wanita, di SMA 2, terus ti jam 8, aya wawancara keur KS: St Mas, Alwi, Rth Dw. Oh geuning ti KS oge aya nu lolos. Sukur we, ceuk hate. Kuring oge miluan, tamba era we, maenya ti pengawas euweuh nu milu. 

Pa Cc menta supaya aya nu ngaganti. Saha atuh nya? Pengawas mah rarriweuh, sok aya wae kgiatan. Nyobaan Bu Lls. Alhamdulillah, daekeun. Mudah-mudahan we pro. Ari dina nu kieu mah, urang teu apal kumaha eusi hate batur pan.