Self harm

M tong nyarios nanaon, kitu ceuk E dina WA. Basa muka WA.

Tadi pas hudang teu aya curiga, biasa we langsung nyiapkeun keur kaperluan poe ieu.

Kadenge E maen piano. Asa tara ti sasari. Tapi teu curiga nanaon. Tonggoy we beberes imah, miceun beurit,  ngome PPT. 

Barang ningali WA, Ampir jam satengah tujuh, langsung ka luhur. Beungeut budak pinuh ku getih. Dina kasur, dina laptop, dina keyboard,dina piano. Kabeh lantis ku getih. Bau hanyir nyesek kana irung.

Masya Alloh,  E. Teu nyaah ka diri.

Budak teh embung dicabak. Menta indit ka dokter dianteur ku babaturanna.

Keur manehna indit, kamar dibersihan. Getih nu geus gararing dielap make wet tissue. Bari cimata mah merebey teu daek eureun. Gusti Nu Maha Agung, kedah kumaha atuh abdi? Ka dokter, atos, ka psikolog,  atos,  ka psikiater,  atos.

Kedah ka mana deui atuh Gusti? Pasihan abdi jalan, pasihan abdi ilham kanggo ngadamangkeun ieu pun anak.

Jol datang ti klinik E teu riuk-riuk jelema nu tos nyilakakeun maneh. 

Babaturanna indit rek kuliah cenah. 

E mah ka imah, dititah dahar. Dipangnyieunkeun sangu goreng. Didahar. Teu siga anu tos cilaka gede budak teh. Hate beuki ngarakacak, boa budak teh teu apal naon-naon, teu sadar. Sok matak hemeng, ari disebut teu ngarti, budak teh sakitu printerna. 

Gusti, matak samagaha hate. 

Pikiran asa buntu,  teu bisa nguteuk. Disertasi asa hayang pluk we ditinggalkeun. Keur naon sakola luhur, meunang gelar doktor, ari anak teu katoong hatena.