Koper

Selasa, 10 Desember 2024

Kapikiran waé,  biasana mun umroh sok aya manasik heula. Keur kuring anu ibadahna kaasup kelas teu goreng-goreng acan atawa basa akademisna mah 'perlu intervensi khusus' perlu dibekelan heula engké ibadah di ditu tèh kumaha. 

Najan geus aya iber umrohna tanggal 6 Januari 2025, sok sieun we, ujug-ujug berangkat. Dianggapna paham urusan ibadah umroh. Padahal mah, jajauheun, matak ngarep-ngarep manasik. 

-----------

Poe Salasa, 10 Desember 2024, awak karasa pasiksak. Geus dua minggu katibanan batuk jeung paranas tiris. Tulang asa nyareri, sora ngahoas loba teuing ngéhkéh batuk. 

Ngadadak poé Salasa téh kudu ka kantor.  Dibejaan jam 8an lamun engké jam 9.00 ibu kepala KCD VI rék ngistrénan  opat PLT kepala SMA jeung SMK. Hoream-hoream ogé,  kuring maksakeun hudang. Lamun lain disaur ku dunungan mah, teu sanggup kudu indit bari hujan ngaririncik, heug jauh deuih, ka Haurwangi, beh ditueun Ciranjang. 

Nepi ka kantor, kuring teu loba ba bi bu, rumasa éra.  Éra lamun batuk, ngajegoh, matak teu ngeunah kana ceuli. Kuring langsung miluan acara ngistrénan.  PlT kepala SMAN 1 Pagelaran, Pa Jakaria, jadi salah sahiji sakola anu jadi binaan. SMAN 1 Cibinong gé sarua merelukeun PLT, tapi teu acan aya informasi saha-sahana.

Bérés acara langsung bangbrat balik. Awak karasa ngeaang tiis. Bisi kumaonam, kuring langsung balik we. 

Nepi ka imah, langsung ngagoler. 

Assalamualaikum wr wb 

utk koper, baju batik & ihram hari senin paling telat sdh bisa diambil d bjb cianjur lantai 2.. 

utk yg di selatan nanti insyallah bisa diambil d bjb terdekat (nanti di informasikan lagi)