Naék Karéta Api ka Madinah

Barang rék naek mobil,  breg baé hujan. Geuning di Mekkah ogé aya hujan kiwari mah? Boa-boa dampak pemanasan global, nepi ogé ka Mekkah. Ceuk pamingpin rombongan,  hujan di Mekkah sakolepat, tapi caina teu kamana-mana, ngaruyumbang we teu nyerep kana taneuh. Palataran sakuriling bungkingna Masjidil Harom kabéh ditembok, tangtuna cai hujan teu bisa indit tina tempat dimana manehna turun. Kaharti lamun hujan 2 jam matak banjir anu bisa nepika malidkeun mobil. Untungna hujanna teu lila. Cuaca langsung robah,  panas deui we teu siga-siga tas hujan gedé mun teu ningali jalan nu pating kuyumbang ku cai mah. 

Sanggeus hujan bener-bener raat, para pemenang naek beus rék ka stasion kareta api. Jadwalna jam 18.00 tapi inditna leuwih awal. Keur jaga-jaga bisi teu bisa kaluar ti masjidil Haram.  Lamun poe Jumaah, masyarakat Mekkah jeung sabudereunna liburan. Maranehna datang ka Mekkah mawa anak-incu-pamajikan-mitoha sabonoroyot ka mall jeung swalayan. Dina poe Jumaah mah, kaayaan di Mekkah, noyék, pinuh ku jelema di mana-mana. Keur asup jeung kaluar mesjid, make sistim asup-buka siga di jalan Cipanas, anu maksudna ngarah teu tumplek dina waktu nu sarua.

Hal anu beurat karasa ku kuring lamun rek asup atawa kaluar masjid dina waktu jelema keur pasedek-sedek. Lamun teu kuat mah matak katurelengan, pingsan. Nya eungap kagencet ku jelema galalede, boh nu awéwé, boh nu lalaki, acan mangrupa babauan, pacampur matak murel. Tah kaluar ti masjid basa tos solat Jumaah ge kitu. Matak pihak travel milih tiket sore, keur jaga-jaga teu bisa kaluar ti mesjid, atawa beus teu nisa asup ka sakitaran hotel.

Sanggeus sarerea naek beus, beus ngageuleuyeung maju ka stasion kareta api. Teu katingal rel-na. Nu katingal ngajungkiring bagian hareup stasion, tohaga kacida bangunanna.

Ku duit mah nanaon ge hebring. Stasion kareta api di Mekkah, nya gede, nya hade. 

Satiap rohangan ditata rapi jeung diperhitungkeun bisa ngangkut jutaan jelema. Lain siga stasiun Cilebut anu matak hareurin.  

Rombongan BJB anu sakitu ratusan jumlahna, teu katingali matak eungap. Loba kénéh tempat nu kosong. Di jero wangunan, plung plong lalega. Keur nu rek nak kareta api, disadiakan puluhan eskalator. Lamun ngangkut jamaah haji, maol kateter.