Kring telepon kamar 0365 El Hotel disada. Kuring ngorejat, jam 01.20.
Teu loba ba bi bu, mandi-kuramas terus solat safar. Sirah asa nyeri. Saré teu puguh alang ujurna.
Jam 5 ngangoler, sigana saré sakerejep. Terus magriban heula jeung isa. Saré deui, da aya béja cenah 'tidak ada makan malam'. Nya sare deui baé. Ngan dikersakeun teu daekeun sare. Guling gasahan we. Ningali jam, geus tabuh 11. Pasrah we. Reup sare sigana. Asa can jejeg saré téh tos dikring-telepon kamar.
Sanggeus tarapti, kuring turun ka kamar 0273 ngajemput Ibu Maskanah sareng Bu Atikah. Aranjeunna mah tidurna sakamar, keueung saurna. Tos yakin siap, bring baé muru beus nomer 1 nu beureum.
Pendamping Beus 1, Ustad Dayat. Sanggeus sarerea aya sesuai absenan, 40 jamaah, beus teh berangkat. Kuring mah saré we, jamaah nu lianna ogé, sarua, sarare.
Waktuna solat subuh, dihudangkeun, terus solat subuh di mesjid. Duka mesjid naon, posisina tukangeun Alfamart. Tos sarerea sarolat, balik deui kana beus. Geuleuyeung maju deui. Can lila asana majuna beus teh, geus eureun deui keur muru sasarap. Sasarapna ogé luar biasa, di Fairfield Marriot.
Jamaah beus nomer 1 jeung nomer 2 sasarapna di Fairfield Marriot, anu di beus 3-4 di hotel nu béda.
Breakfast Fairfield Marriott 6.47
Di Fairfield Marriot dibéré waktu nepika tabuh 08.15. Kuring leuleumpangan ngalempengkeun suku nu nilep baé salila diuk dina beus.
Ti Fairfield Marriott ka bandara kurang ti 30 menit, kitu kasauran pendamping.
Innalillahi wa innailaihi rojiun...
Bapa ibu mohon doanya untuk Ibunda dari teh Yugi (peserta grup 1) yang qadarullah meninggal tadi subuh. Semoga almarhumah husnul khotimah dan keluarga yg ditinggalkan diberikan keikhlasan dan kesabaran..Aamiin YRA
Kuring ukur bisa nyebut ngiring belasungkawa. Kacipta kaweur jeung sabilna haté lbu Yugi. Ari neruskeun berangkat umroh, piraku teu ngahadiran poe panungtung indung aya di alam dunya. Ari teu berangkat, mubah ti mimiti visa nepika sarana prasarana hadiah ti BJB. Milih berangkat atawa teu berangkat, kumaha lbu Yugi baé. Pilihan nu mana wae ogé nu dijadikeun kaputusan, éta bener.
No comments:
Post a Comment